Thursday 21 November 2013

മട്ടാഞ്ചേരി...

ട്ടാഞ്ചേരി... കൊച്ചി നഗരത്തിന്റെ പടിഞ്ഞാറന്‍ ഭാഗത്തായി എറണാകുളം നഗരത്തില്‍ നിന്നും ഏകദേശം 9 കി.മീ. ദൂരത്തില്‍ സ്ഥിതി ചെയ്യുന്ന ഒരു തുറമുഖ പ്രദേശം. നഗരത്തിലെ ബോട്ട് ജെട്ടിയില്‍ നിന്നും ഏതാണ്ട് ഇരുപത് മിനിട്ട്  യാത്ര ചെയ്താല്‍ മട്ടാഞ്ചേരിയില്‍ എത്തിച്ചേരാം. ഓളപ്പരപ്പുകളില്‍ കൊട്ടാരം തീര്‍ത്തു കൊണ്ട് നങ്കൂരമിട്ടിരിക്കുന്ന ഭീമാകാരന്മാരായ കപ്പലുകള്‍ യാത്രക്കിടയിലെ നയനാനന്ദകരമായ ഒരു കാഴ്ചയാണ്. 
                         എറണാകുളം നഗരത്തിലെ തിരക്കുകളില്‍ നിന്നെല്ലാം മുക്തമാണ് അറബിക്കടലിനോട്‌ ചേര്‍ന്നു കിടക്കുന്ന ഈ പ്രദേശം. നിരത്തുകളില്‍ വരിവരിയായി ആഭരണ ശാലകളും ഫല വ്യഞ്ജനങ്ങള്‍ വില്‍ക്കപ്പെടുന്ന കടകളും ശില്പ ശാലകളും കാണാം. സഞ്ചാരികളുടെ പ്രധാന ആകര്‍ഷണ കേന്ദ്രങ്ങളില്‍ ഒന്നായ മട്ടാഞ്ചേരിയിലെ ഡച്ച്‌ കൊട്ടാരമായിരുന്നു ഞങ്ങള്‍ ആദ്യം സന്ദര്‍ശിച്ചത്. 16 ആം നൂറ്റാണ്ടില്‍ പോര്‍ച്ചുഗീസുകാര്‍ പണി­ത് കൊ­ച്ചി­യി­ലെ അന്ന­ത്തെ രാ­ജാ­വായ രാജ വീര കേ­രള വര്‍­മ്മ­യ്ക്ക് സമ്മാ­നി­ച്ച­താ­ണ്.ഈ കൊട്ടാരം. പിന്നീട് 17 ആം നൂറ്റാണ്ടിന്റെ മദ്ധ്യത്തില്‍ ഡച്ചുകാര്‍ ഇത് പുതുക്കിപ്പണിതു. ഇപ്പോള്‍ കേരള ടൂറിസം വികസന വകുപ്പിന്റെ (KTDC) കീഴില്‍ മ്യൂസിയമായി ഈ ചരിത്ര സ്മാരകം നില കൊള്ളുന്നു. രാജ വാഴ്ചയുടെ അടയാളങ്ങളായി പല്ലക്കുകളും രാജാക്കന്മാര്‍ യുദ്ധ ആവശ്യങ്ങള്‍ക്കായി ഉപയോഗിച്ചിരുന്ന ആയുധങ്ങളും നാണയങ്ങളും വസ്ത്രങ്ങളും പാത്രങ്ങളുമെല്ലാം  ഇവിടെ പ്രദര്‍ശനത്തിനു വെച്ചിരിക്കുന്നു. ചുവരുകളില്‍ രചനാ വൈഭവം വിളിച്ചോതുന്ന ചിത്രങ്ങളും ക്യാമറയില്‍ പകര്‍ത്തിയ ബ്ലാക്ക് & വൈറ്റ് ഫോട്ടോകളും കാണാം. കൊട്ടാരത്തിന്റെ ഭൂരിഭാഗം നിര്‍മാണ പ്രവര്‍ത്തനങ്ങള്‍ക്കും തടിയാണ് ഉപയോഗിച്ചിട്ടുള്ളത്. തടി കൊണ്ട് നിര്‍മിക്കപ്പെട്ടിട്ടുള്ള കൂറ്റന്‍ ജനല്‍പ്പാളികള്‍ക്ക്  അരികിലായി ഇരിപ്പിടങ്ങളും സജ്ജമാക്കിയിരിക്കുന്നു. നൂറ്റാണ്ടുകള്‍ക്കപ്പുറം നമ്മുടെ നാട് ഭരിച്ചിരുന്ന രാജാക്കന്മാര്‍ വിശ്രമത്തിനായി ഉപയോഗിച്ചിരുന്നതാകാം ആ ഇരിപ്പിടങ്ങള്‍ എന്ന്‍ ഒരു സുഹൃത്ത് അഭിപ്രായപ്പെട്ടു. അവിടെ ഇരുന്ന്‍ ജനല്പ്പാളികള്‍ക്കിടയിലൂടെ പുറത്തേക്ക് നോക്കിയപ്പോള്‍ നൂറ്റാണ്ടുകള്‍ പിന്നിലേക്ക് പോയ ഒരു അനുഭൂതി... 
                     പുറത്ത് നല്ല മഴ.. തകര്‍ത്ത് പെയ്യുന്ന മഴയെ അവഗണിച്ചു കൊണ്ട് ഞങ്ങള്‍ മുന്നോട്ട് നടന്നു. പാലസിനോട് ചേര്‍ന്ന്‍ തന്നെ മട്ടാഞ്ചേരി പഴയന്നൂര്‍ ക്ഷേത്രം കാണാം. ക്ഷേത്രത്തിന് അരികിലൂടെ ഞങ്ങള്‍ നടന്ന്‍ പുറത്തേക്കുള്ള പ്രവേശന കവാടത്തില്‍ എത്തിച്ചേര്‍ന്നു. ഇനി അടുത്ത ലക്ഷ്യം ജൂത പ്പള്ളിയാണ്. ജൂതപ്പള്ളിയെ ലക്ഷ്യമാക്കി ഞങ്ങള്‍ നടന്നു. ചരിത്രം ഉറങ്ങുന്ന മണ്ണിലൂടെ മഴയത്ത് നടക്കാന്‍ വല്ലാത്തൊരാവേശം. വഴിയരികില്‍ ധാരാളം കച്ചവട ശാലകള്‍ കാണാം. മലയാളികളേക്കാള്‍ കൂടുതല്‍ നോര്‍ത്ത് ഇന്ത്യന്‍സ് ആണിവിടെ കച്ചവടം നടത്തുന്നത് എന്ന്‍ തോന്നുന്നു. നടന്ന്‍ നടന്ന്‍ ഞങ്ങള്‍ ജൂത തെരുവിലെത്തി. പേര് മാത്രമേയുള്ളൂ.. ഒന്നോ രണ്ടോ ജൂത കുടുംബങ്ങള്‍ മാത്രമാണ് ഇവിടെ ഇപ്പോള്‍ താമസിക്കുന്നത്. ജൂത ഭവനങ്ങളുടെ പ്രത്യേകതകള്‍ നോക്കി മനസ്സിലാക്കി ഞങ്ങള്‍ നടന്നു. സന്ദര്‍ശകരുടെ ശല്യം കൊണ്ടാണെന്ന് തോന്നുന്നു. മിക്ക വീടുകളും അടഞ്ഞു കിടക്കുന്നു. മഴക്ക് ഒരല്പം ശമനം വന്നിരിക്കുന്നു. സിനഗോഗിന് അടുത്ത് എത്തിയപ്പോഴാണ് അറിയുന്നത് ശനിയാഴ്ച പള്ളിയിലേക്ക് പ്രവേശനം ഇല്ല എന്ന്‍. നിരാശരായി ഞങ്ങള്‍ക്ക് അവിടെ നിന്ന്‍ മടങ്ങേണ്ടി വന്നു. സിനഗോഗിന് മുകളില്‍ കെട്ടി തൂക്കിയിരിക്കുന്ന വലിയ ഒരു മണി ആ കെട്ടിടത്തിന്റെ മനോഹാരിതക്ക് മാറ്റ് കൂട്ടുന്നു. മറ്റൊരു ദിവസം സിനഗോഗ് സന്ദര്‍ശനം നടത്താം എന്ന ഉറപ്പോടെ ഞങ്ങള്‍ തിരിച്ചു നടന്നു.
                    മട്ടാഞ്ചേരിയിലെ നിരത്തുകള്‍ പോലും അവിടുത്തെ സാംസ്കാരിക പെരുമ വിളിച്ചോതുന്നുണ്ട്. ഹൈന്ദവനും ക്രൈസ്തവനും മുസ്ലിമും ജൂതനും ജൈനനും എല്ലാം ഒരുമിച്ചു വാഴുന്ന ഭാരതീയ സംസ്കാരത്തിന്റെ പരിചേദം . വഴിയരികില്‍ അങ്ങിങ്ങായി ചെറിയ ചെറിയ ക്ഷേത്രങ്ങളും അഗ്രഹാരങ്ങളും കാണാം. അടഞ്ഞും പാതി തുറന്നും കിടക്കുന്ന പടുകൂറ്റന്‍ വാതിലുകള്‍. മട്ടാഞ്ചേരിയിലെ തെരുവുകളിലേക്കുള്ള പ്രവേശന കവാടങ്ങള്‍ ആണ് അവ എന്ന്‍ തോന്നുന്നു. അവയുടെ ഉള്ളറകളിലേക്ക് ഒന്ന്‍ എത്തി നോക്കുവാന്‍ ആഗ്രഹം തോന്നി. ചെങ്കല്ല് കൊണ്ട് പണി കഴിപ്പിച്ചിരിക്കുന്ന ഒരു ജൈന ക്ഷേത്രവും മട്ടാഞ്ചേരിയുടെ ആകര്‍ഷണീയതയാണ്. ജൈന മത വിശ്വാസികള്‍ അവിടെ തങ്ങളുടെ പ്രാര്‍ഥനയും കര്‍മങ്ങളും നടത്തി പോരുന്നു. 
            വിദേശ അധിനിവേശത്തിനു സാക്ഷിയായി ഈ മണ്ണില്‍ ഒരു ഡച്ച് സെമിത്തേരി നില കൊള്ളുന്നു. വാസ്കോഡഗാമ യുടെ ശവ ശരീരം ആദ്യം അടക്കം ചെയ്തിരുന്ന സെന്റ്‌. ഫ്രാന്‍സിസ് ചര്ച്ചിലേക്ക് ഞങ്ങള്‍ പുറപ്പെട്ടു. ഫോര്‍ട്ട്‌ കൊച്ചിയിലാണ് ഈ ചര്‍ച്ച്. 1539 ല്‍ ശരീരം പോര്ച്ചുഗലിലെക്ക് മടക്കി കൊണ്ടു പോയി. 
                   മട്ടാഞ്ചേരിയില്‍ നിന്ന്‍ മടങ്ങുമ്പോള്‍ ചുരുങ്ങിയ സമയത്തിനുള്ളില്‍ ഭാരതത്തിന്റെ ചരിത്ര ഭൂമികളിലൂടെ സഞ്ചരിച്ച പ്രതീതി.  ഒരിക്കല്‍കൂടി ഈ മണ്ണിലേക്ക് തിരികെ വരണം. ഈ മണ്ണിന്റെ സാംസ്കാരിക പെരുമയെ വാഴ്ത്തണം. മട്ടാഞ്ചേരിയുടെആഴങ്ങളിലേക്ക് ഇറങ്ങി ചെല്ലണം. ഇവിടത്തെ തെരുവുകളിലൂടെ സഞ്ചരിക്കണം. മനുഷ്യ ജീവിതത്തിന്റെ വേറിട്ട തലങ്ങള്‍ കണ്ടെത്തണം. ഞാന്‍ മനസ്സില്‍ ഉറപ്പിച്ചു.....
ജൈന ക്ഷേത്രം
ജൂതപ്പള്ളി
ഡച്ച് സെമിത്തേരി
മട്ടാഞ്ചേരിയിലെ തെരുവ് (ഒരു രാത്രിക്കാഴ്ച്ച)
ഡച്ച് കൊട്ടാരം

5 comments:

  1. This comment has been removed by the author.

    ReplyDelete
  2. സംഭവം കൊള്ളാം.
    വേറൊരു കാഴ്ച കണ്ടത് നീ എഴുതിയില്ലല്ലോ... രണ്ബീര്‍ കപൂറിന്റെ ഡ്യൂപ്പും മേസ്ട്രോ സ്കൂട്ടറും പിന്നെ മെഴുകുപ്രതിമപോലുള്ള സുന്ദരിയും....അവളുടെ പുറകെ നീ നടന്നതും :) ....
    അതൊക്കെ ഇത്ര പെട്ടന്ന് മറന്നോ? :P

    ReplyDelete
    Replies
    1. രണ്ബീര്‍ കപൂറിന്റെ ഡ്യൂപ്പും മേസ്ട്രോ സ്കൂട്ടറും പിന്നെ മെഴുകുപ്രതിമപോലുള്ള സുന്ദരിയും....

      അത് മനപ്പൂര്‍വം ഉപേക്ഷിച്ചതാ.. മറ്റൊരവസരത്തില്‍ ഇലക്കാടന്‍ തന്നെ സംഭവം വിശദീകരിച്ചാല്‍ മതി.. അതാകുമ്പോള്‍ സംഗതി ജോറാകും.. പ്രത്യേകിച്ച് മെഴുകുപ്രതിമപോലുള്ള സുന്ദരി..

      Delete
  3. അറബിക്കടലിന്റെ റാണി
    നമ്മടെ കൊച്ചി

    ReplyDelete
    Replies
    1. ഈ തുടക്കക്കാരന്റെ ബ്ലോഗ്‌ വായനക്കായി എടുത്തതിനും കമന്റ് ചെയ്ത് പ്രോത്സാഹിപ്പിച്ചതിനും നന്ദി...

      Delete